- 53 -

1293, April 12. Schrom.

Ritter Moyko, des weiland Dyrislaus von Baitzen Sohn, errichtet in seinem Dorfe Schrom eine Kirche und stattet dieselbe aus.

In nomine patris et filii et spiritus sancti. Quoniam ea, que ad augmentum divini cultus ex Christi fidelium pia devotione rite provenerunt, vigorem sortiuntur merito illibatum, ego Moyko miles, filius bone memorie Dyrislai de Bycen, huius scripti testimonio in noticiam devenire cupio presencium et ad memoriam descendere posterorum, quod eterne mercedis intuitu et obtentu necnon ob spem salutis mee meorumque progenitorum omnium et heredum de beneplacito et assensu venerabilis patris domini Johannis Wrat. episcopi in villa mea, que Sram vulgariter nuncupatur, ecclesiam parrochialem ad laudem dei omnipotentis et specialiter in honorem sancti spiritus construi faciens ac fundari, eidem ecclesie duos parvos mansos agrorum omnino liberos de bonis meis in dicta villa mea Sram sub titulo vere dotis possessionis ac proprietatis dedi, contuli et perpetuo permansuros fideli provisionis ac devotionis sollicitudine sollempniter assignavi. Et ut in ipso loco decor ecclesiastice dignitatis clarius elucescat rectorque ipsius ecclesie, qui pro tempore fuerit, in ibidem sustentationem habere valeat congruam et decentem, quinque marcas argenti nichilominus in censu omnibus annis in festo apostolorum Phillippi et Jacobi de viginti ortis in villa mea Rychnowe noviter instauratis ipsosque ortos omnes et singulos cum plena iurisdictione, dominio et honore videlicet cum hominibus ortulanis ipsorumque hominum laboribus et serviciis semper annuatim tempore messis michi per dies tres ex iure debitis necnon cum aliis usibus ac utilitatibus universis quocunque nomine censeantur, prout ipsos ortos cum censu predicto et omnia supra scripta hactenus iure veri dominii tenui et possedi, ecclesia predicta similiter per donationem et assignationem meam voluntariam, liberam atque puram sempiterno tempore dotis nomine obtinebit. Ut autem factum huiusmodi tam pium quam laudabile perhenniter inviolabiliter perseveret nomenque domini benedictum ex inde gloriosius predicetur, presentis privilegii patrocinio super hoc ecclesie iam prefate duxi fidenter providendum. Datum in Sram anno domini M°.CC°. nonagesimo tercio pridie Ydus Aprilis die funda­tionis, quam eciam fundationem vir honorabilis magister Myroslaus ex commissione predicti domini Johannis Wrat. episcopi celebravit presentibus testibus infra scriptis: videlicet Dyrchone fratre meo, domino Gunthero de Bywersten domini regis Bohemie capellano, domino Henrico plebano de Paschowe, Myleio plebano de Bycen, Henrico plebano de Crelkowe, Pribkone plebano de Hertwikswalde, Henrico magistro conversorum, Waltero cantore, Mychaele custode fratribus de Camenz, domino Baldwino milite aliisque quam pluribus fide dignis.

S. No. LXI.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.